Беларуская Рада культуры і Imaguru Startup HUB Vilnius абвяшчаюць збор ідэй і ўдзельнікаў(-іц) на першы хакатон праектаў для культуры Беларусі – як сферы каштоўнасцяў, асновы ідэнтычнасці і прафесійнага поля ў яго разнастайнасці.
“КУЛЬТУРНЫ КОД” – гэта выдатная магчымасць:
- Атрымаць доступ да моцнай экспертызы запрошаных ментараў і ментарак, падабраных адпаведна заяўленым ідэям.
- Сабраць міждысцыплінарную каманду спецыялістаў, якіх зазвычай цяжка знайсці
- Пазнаёміцца з цікавымі і амбітнымі ідэямі адмыслоўцаў у актуальнай культуры Беларусі і з сумежных сфер
- Рэалізаваць “набалелыя” ідэі для беларускай культуры, мастацтва, спадчыны, якія патрабуюць тэхналагічнай асновы ці “абгорткі”
ДА ЎДЗЕЛУ ЗАПРАШАЮЦЦА
- Культурніцкія/творчыя дзеячы з самых розных сфер дзейнасці
- Спецыялісты(-кі) у ІТ і/альбо бізнесе: праграмісты, бізнес-аналітыкі
- Маркетолагі і PR-менеджары, дызайнеры і інш.
МАГЧЫМЫЯ ТЭМЫ ДЛЯ ПРАЕКТАЎ
- Бізнес- і стартап-ідэі на аснове сінтэзу культурніцкай/мастацкай дзейнасці і тэхналогій
- Інструменты для анлайн-удзелу і прыцягнення аўдыторый да культурных мерапрыемстваў
- Алічбоўка аб’ектаў гісторыка-культурнай спадчыны
- AR/VR/XR-тэхналогіі для дыгіталізацыі культурніцкага досведу (у тэатрах і перфарматыўных практыках, арт-экспазіцыях і музеях, гарадскіх прасторах і інш.)
- IT-інструменты для нэтворкінгу ў сферы культуры і па прадметных абласцях
- NFT-платформы, аўкцыёны на блакчэйн-тэхналогіях
- Legaltech, fintech-праекты для падтрымкі мастацтва, спадчыны і прафесійных супольнасцяў у культуры
Не абмяжоўвайцеся пазначанымі тэмамі - прапануйце свае ідэі на карысць беларускай культуры ўнутры краіны і за мяжой!
Натхніцеся таксама дакладамі канферэнцыі Digital Future of Belarus.
